Статут горада Мінска

Рашэнне Мінскага гарадскога савета дэпутатаў
26 чэрвеня 2001 г. № 193

Аб зацвярджэнні статута горада Мінска


Змены і дапаўненні:
Рашэнне Мінскага гарадскога Савета дэпутатаў ад 16 кастрычнiка 2003 г. № 64
(Нацыянальны рэестр прававых актаў Рэспублікі Беларусь, 2003 г., № 126, 9/3009)

У адпаведнасці з артыкулам 6 Закона Рэспублікі Беларусь ад 12 ліпеня 2000 г. № 410-З "Аб статусе сталіцы Рэспублікі Беларусь - горада Мінска" (Нацыянальны рэестр прававых актаў Рэспублікі Беларусь, 2000 г., № 67, 2/185) Мінскі гарадскі Савет дэпутатаў вырашыў:
  1. Зацвердзіць прыкладзены Статут горада Мінска.
  2. Гэта рашэнне ўступае ў сілу з дня яго афіцыйнага апублікавання.
  3. Кантроль за выкананнем дадзенага рашэння ўскласці на намесніка старшыні Мінскага гарадскога Савета дэпутатаў мандатную, па галоснасці, самакіраванні і правапарадку.
Cтаршыня У.М.ПАПКОЎСКІ
 
  ЗАЦВЯРДЖАЮ
Рашэнне Мінскага гарадскога
савета дэпутатаў
26.06.2001 № 193
 
СТАТУТ
горада Мінска

Статут горада Мінска – нарматыўны прававы акт, які вызначае на аснове заканадаўства кірунак і парадак узаемадзеяння Мінскага гарадскога Савета дэпутатаў, выканаўчых і распарадчых органаў, органаў тэрытарыяльнага грамадскага самакіравання па пытаннях ажыццяўлення ў сталіцы кіравання і самакіравання, асаблівасці фарміравання і паўнамоцтваў органаў тэрытарыяльнага грамадскага самакіравання, горадабудаўнічага ўпарадкавання, іншыя пытанні, якія тычацца ажыццяўлення горадам Мiнскам функцый сталiцы Рэспублікі Беларусь.
 
Глава 1. Горад і яго тэрыторыя

Артыкул 1. Статус горада

У адпаведнасці з Канстытуцыяй Рэспублікі Беларусь горад Мінск з'яўляецца сталіцай Рэспублікі Беларусь. Статус горада Мінска вызначаецца заканадаўствам і дадзеным Статутам. Горад Мінск з'яўляецца адміністрацыйна-тэрытарыяльнай адзінкай, мае тэрыторыю, насельніцтва, органы гарадскога кіравання і самакіравання, герб, сцяг і гімн.
 
Артыкул 2. Насельніцтва горада

Насельніцтва горада Мінска складаюць яго жыхары (мінчане) – грамадзяне Рэспублікі Беларусь, замежныя грамадзяне і асобы без грамадзянства, якія маюць ў адпаведнасці з заканадаўствам пастаяннае месца жыхарства ў горадзе. Асобы, якія часова пражываюць у сталіцы, незалежна ад іх грамадзянства валодаюць тымі ж правамі, нясуць такія ж абавязкі, як і жыхары Мінска, калi iншае не прадугледжана заканадаўствам.
 
Артыкул 3. Органы мясцовага кіравання і самакіравання

Сістэму органаў гарадскога кіравання ўтвараюць Мінскі гарадскі выканаўчы камітэт (далей – выканаўчы камітэт) і адміністрацыі раёнаў горада. Сістэму органаў гарадскога самакіравання ўтвараюць Мінскі гарадскі Савет дэпутатаў (далей – Савет), органы тэрытарыяльнага грамадскага самакіравання. Жыхары горада ажыццяўляюць сваю ўладу непасрэдна праз мясцовыя рэферэндумы, выбары Савета, мясцовыя сходы, а таксама праз прадстаўнічыя і іншыя органы ў формах i межах, вызначаных заканадаўствам.
 
Артыкул 4. Сімвалы горада

Сімваламі горада з'яўляюцца герб горада Мінска, сцяг горада Мінска, гімн горада Мінска. Герб горада Мінска ўяўляе сабой барочны шчыт, у блакітным полі якога намалявана Божая Маці на сярэбраным воблаку ў чырвона-сіняй вопратцы, два анёлы і два херувімы. Сцяг горада Мінска ўяўляе сабой прамавугольнае палотнішча блакітнага колеру з выявай у цэнтры гербавай эмблемы горада Мінска. Апісанне герба і сцяга, а таксама тэкст і музыка гімна горада Мінска, парадак іх афіцыйнага выкарыстання зацвярджаюцца Саветам па прадстаўленні выканаўчага камітэта.
 
Артыкул 5. Дзень горада

Дзень горада Мінска – агульнагарадское свята, адзначаецца штогод у другую суботу верасня. Арганізацыя і фінансаванне свята ажыццяўляюцца выканаўчым камітэтам.
 
Артыкул 6. Ганаровыя званні і заахвочванні горада

За асаблівыя заслугі ў развіцці эканомікі, сацыяльнай сферы, навукі і культуры горада Мінска грамадзяніну Рэспублікі Беларусь, а таксама замежнаму грамадзяніну за выдатны ўклад у развіццё горада можа прысвойвацца званне "Ганаровы грамадзянін горада Мінска". Парадак прысваення ганаровага звання, правы і прывілеі ганаровых грамадзян устанаўлiваюцца Саветам і выканаўчым камітэтам. Выканаўчы камітэт, Савет мае права ўстанаўліваць і прымяняць іншыя віды заахвочванняў грамадзян і працоўных калектываў горада Мінска
 
Артыкул 6 – са зменамі, унесенымі рашэннем Мінскага гарадскога Савета дэпутатаў ад 16 кастрычнiка 2003 г. № 6
 
Артыкул 7. Тэрыторыя горада

Тэрыторыя горада Мінска вызначаецца гарадской лініяй (граніцай), у межах якой ажыццяўляюцца гарадское кіраванне і самакіраванне. У склад тэрыторыі горада ў адпаведнасці з заканадаўствам могуць быць перададзены іншыя тэрыторыі (землі). Устанаўленне і змяненне гарадской рысы ажыццяўляюцца Прэзідэнтам Рэспублікі Беларусь па прадстаўленні Савета Міністраў Рэспублікі Беларусь на аснове прапаноў Савета і выканаўчага камітэта. Тэрыторыя горада выкарыстоўваецца ў адпаведнасці з генеральным планам і планамі землеўпарадкавання горада Мінска.
 
Артыкул 8. Адміністрацыйна-тэрытарыяльнае дзяленне горада

Тэрыторыя горада Мінска ў мэтах эфектыўнага кіравання і аптымальнай арганізацыі выканання рашэнняў, звязаных з задавальненнем сацыяльна-культурных і бытавых патрэб грамадзян, аховай правапарадку і захаваннем законнасці, дзеліцца на раёны. Утварэнне, змяненне і скасаванне раёнаў горада, прысваенне ім назваў ажыццяўляюцца Прэзідэнтам Рэспублікі Беларусь па прадстаўленні Савета Міністраў Рэспублікі Беларусь на аснове прапаноў Савета і выканаўчага камітэта.
 
Артыкул 9. Прыгарадная тэрыторыя (зона)

Землі за межамі гарадской рысы Мінска, якія служаць рэзервам для пашырэння яго тэрыторыі, месцам размяшчэння і будаўніцтва збудаванняў, звязаных з добраўпарадкаваннем і нармальным функцыянаваннем гарадской гаспадаркі, што выконваюць ахоўныя, санітарна-гігіенічныя і аздараўленчыя функцыі і з'яўляюцца месцам адпачынку насельніцтва, вылучаюцца ў прыгарадную тэрыторыю (зону) горада.

Вылучэнне і выкарыстанне зямель прыгараднай тэрыторыі (зоны) ажыццяўляюцца ва ўстаноўленым заканадаўствам парадку.
 
Глава 2. Мінскі гарадскі Савет дэпутатаў

Артыкул 10. Статус Мінскага гарадскога Савета дэпутатаў

Савет з'яўляецца прадстаўнічым дзяржаўным органам і асноўным звяном сістэмы самакіравання горада.

Савет з'яўляецца юрыдычнай асобай.

Арганізацыя і дзейнасць Савета рэгулююцца Канстытуцыяй Рэспублікі Беларусь, заканадаўчымі і іншымі нарматыўнымі прававымі актамі, дадзеным Статутам і рэгламентам Савета.

Савет складаюць дэпутаты, выбраныя грамадзянамі горада на аснове ўсеагульнага, свабоднага, роўнага і прамога выбарчага права пры тайным галасаванні тэрмінам на чатыры гады. Савет ажыццяўляе сваю дзейнасць праз сесіі, пастаянныя і часовыя камісіі і іншыя органы Савета, а таксама шляхам рэалізацыі дэпутатамі сваіх паўнамоцтваў у парадку, устаноўленым заканадаўствам. У выпадках, прадугледжаных законам, паўнамоцтвы Савета могуць быць датэрмiнова спынены.

Па рашэнні сесіі Савет выступае ініцыятарам унясення змяненняў і дапаўненняў у заканадаўчыя акты з накіраваннем адпаведных зваротаў да суб'ектаў права заканадаўчай ініцыятывы, а таксама з прапановамі пры распрацоўцы дзяржаўных праграм і планаў падрыхтоўкі праектаў нарматыўных прававых актаў Рэспублікі Беларусь.
 
Артыкул 11. Кампетэнцыя Мінскага гарадскога Савета дэпутатаў

Да кампетэнцыі Савета адносяцца:
  • зацвярджэнне стратэгічнага плана, прагнозаў і праграм сацыяльна-эканамічнага развіцця горада;
  • зацвярджэнне і змяненне Статута горада;
  • зацвярджэнне бюджэту горада і справаздачы аб яго выкананні, унясенне пры неабходнасці змяненняў у яго;
  • зацвярджэнне генеральнага плана развіцця горада, планаў землеўпарадкавання яго тэрыторыі і праекта планіроўкі прыгараднай тэрыторыі (зоны);
  • рашэнне ў адпаведнасці з заканадаўствам пытанняў адміністрацыйна-тэрытарыяльнага ўладкавання горада;
  • устанаўленне ў адпаведнасці з заканадаўствам мясцовых падаткаў, збораў і пошлін, а таксама тарыфаў па аплаце бытавых, камунальных, транспартных і іншых паслуг, калі гэта не ўстанаўліваецца вышэйстаячымі дзяржаўнымі органамі;
  • вызваленне юрыдычных і фізічных асоб ад збірання мясцовых падаткаў, збораў і пошлін або ўстанаўленне парадку такога вызвалення;
  • вызначэнне ў межах, устаноўленых заканадаўствам, парадку кiравання i распараджэння камунальнай уласнасцю;
  • прызначэнне мясцовых рэферэндумаў, вынясенне праекта нарматыўнага прававога акта на публічнае абмеркаванне насельніцтвам горада;
  • прызнанне паўнамоцтваў дэпутатаў Савета і іх датэрміновае спыненне;
  • абранне і вызваленне ад абавязкаў старшыні Савета і яго намеснікаў;
  • зацвярджэнне ва ўстаноўленым парадку на пасаду старшыні выканаўчага камітэта;
  • зацвярджэнне структуры Савета, вызначэнне выдаткаў, неабходных для яго ўтрымання і дзейнасці;
  • зацвярджэнне рэгламенту Савета;
  • заслухоўванне справаздач старшыні Савета, пастаянных камісій, іншых органаў, утвораных або выбраных Саветам, выбраных, прызначаных або зацвярджаюцца ім службовых асоб, справаздач і інфармацыі старшыні выканаўчага камітэта;
  • адмена ў выпадку неадпаведнасці заканадаўству распараджэнняў старшыні Савета, рашэнняў выканаўчага камітэта і распараджэнняў яго старшыні, актаў органаў тэрытарыяльнага грамадскага самакіравання;
  • разгляд запытаў дэпутатаў і прыняцце па іх рашэнняў;
  • прыняцце рашэнняў аб выпуску мясцовых пазык, выдзяленні датацый, субвенцый, іншых пазык і закладзе камунальнай уласнасці для атрымання інвестыцыйных крэдытаў;
  • забеспячэнне развіцця і каардынацыя дзейнасці органаў тэрытарыяльнага грамадскага самакіравання, аказанне ім арганізацыйна-метадычнай дапамогі;
  • забеспячэнне ўзаемасувязі і ўзаемадзеяння насельніцтва Мінска з мясцовымі і рэспубліканскімі дзяржаўнымі органамі;
  • дэлегаванне паўнамоцтваў, не аднесеных законам да выключнай кампетэнцыі Савета, выканаўчаму камітэту, адміністрацыям раёнаў горада, органам тэрытарыяльнага грамадскага самакіравання;
  • зацвярджэнне правіл добраўпарадкавання і ўтрымання горада;
  • устанаўленне парадку запрашэння іншагародніх грамадзян для працы і жыхарства ў Мінску і памеру платы за кожнага запрошанага з улікам выдаткаў на развіццё сацыяльнай інфраструктуры горада;
  • вызначэнне ў адпаведнасці з заканадаўчымі актамі асаблівасцей набыцця і абмену жылых памяшканняў у горадзе Мінску ў дамах дзяржаўнага і прыватнага жыллёвага фонду грамадзянамі Рэспублікі Беларусь, замежнымі грамадзянамі і асобамі без грамадзянства, якія не пражываюць пастаянна ў горадзе Мінску;
  • зацвярджэнне парадку ўзгаднення органамі апекі і папячыцельства горада здзелак адчужэння,закладу і абмену жылых памяшканняў асобных катэгорый грамадзян;
  • унагароджанне Ганаровай граматай Савета за заслугі ў развіцці эканомікі, сацыяльнай сферы, навукі і культуры горада;
  • іншыя пытанні, аднесеныя да кампетэнцыі Савета заканадаўствам, у тым ліку звязаныя з ажыццяўленнем горадам Мінскам сталічных функцый.
Артыкул 12. Структура Мінскага гарадскога Савета дэпутатаў

Структура Савета ўключае:
  • старшыню Савета;
  • намеснікаў старшыні Савета;
  • пастаянныя камісіі Савета і іншыя пастаянныя і часовыя органы, утвораныя Саветам;
  • прэзідыум Савета.
Парадак фарміравання, кампетэнцыя органаў Савета вызначаюцца заканадаўствам, гэтым Статутам і рэгламентам Савета.
 
Артыкул 13. Прэзідыум Мінскага гарадскога Савета дэпутатаў

У склад прэзідыума Савета ўваходзяць: старшыня Савета, яго намеснiкi, старшынi пастаянных камiсiй Савета.

Асноўнай формай дзейнасці прэзідыума з'яўляецца пасяджэнне.

Прэзідыум Савета:
  • арганізуе разам са старшынёй Савета працу па скліканні сесій Савета, паведамляе дэпутатам і даводзіць да ведама насельніцтва час і месца правядзення сесій, а таксама пытанні, якія ўносяцца на разгляд Савета, і прынятыя па iх рашэннi;
  • ажыццяўляе кіраўніцтва падрыхтоўкай сесій Савета і пытанняў, якія ўносяцца на іх разгляд;
  • каардынуе дзейнасць пастаянных і часовых камісій, дэпутацкіх груп, уносіць на разгляд Савета прапановы аб стварэнні пастаянных камісій Савета;
  • зацвярджае палажэнне аб пастаянных камісіях Савета;
  • арганізуе кантроль за выкананнем рашэнняў Савета;
  • інфармуе Савет аб сваёй дзейнасці;
  • аказвае садзейнічанне дэпутатам у ажыццяўленні імі сваіх паўнамоцтваў і забяспечвае іх неабходнай інфармацыяй;
  • уносіць на сесію Савета прапановы па пытаннях, звязаных з рэалізацыяй правоў і выкананнем абавязкаў дэпутатаў, у тым ліку з вызваленнем дэпутатаў ад выканання імі вытворчых абавязкаў на час падрыхтоўкi i правядзення сесiй Савета, пасяджэнняў яго пастаянных і часовых камісій;
  • арганізуе ўзаемадзеянне Савета з выканаўчым камітэтам і адміністрацыямі раёнаў горада, грамадскімі аб'яднаннямі, органамі тэрытарыяльнага грамадскага самакіравання;
  • забяспечвае галоснасць работы Савета;
  • арганізуе абмеркаванне грамадзянамі праектаў рашэнняў Савета, iншых важнейшых пытанняў гарадскога значэння; забяспечвае шырокі ўдзел грамадскіх аб'яднанняў і грамадзян у распрацоўцы, прыняцці і рэалізацыі рашэнняў па гэтых пытаннях;
  • забяспечвае разгляд зваротаў грамадзян, якiя адрасаваны Савету;
  • уносіць ва ўстаноўленым парадку прапановы аб прадстаўленні да ўзнагарод і заахвочванняў арганізацый і грамадзян;
  • арганізуе ў адпаведнасці з заканадаўствам правядзенне выбараў і рэферэндумаў;
  • уносіць у выпадках, прадугледжаных заканадаўствам, на разгляд Савета пытанні аб датэрміновым спыненні паўнамоцтваў дэпутатаў;
  • разглядае адрасаваныя яму запыты і адказвае на іх у парадку i тэрмiны, устаноўленыя заканадаўствам;
  • накіроўвае на заключэнне адпаведных пастаянных камісій праекты рашэнняў Савета, пры неабходнасці арганізуе іх юрыдычную і іншую экспертызу;
  • уносіць на разгляд сесіі Савета прапановы па заявах і скаргах на рашэнні і дзеянні выканаўчага камітэта;
  • ажыццяўляе іншыя, вызначаныя рэгламентам Савета функцыі ў межах паўнамоцтваў Савета.
Артыкул 14. Старшыня Мінскага гарадскога Савета дэпутатаў

Старшыня Савета абіраецца з ліку дэпутатаў тайным галасаваннем на сесіі Савета; парадак правядзення тайнага галасавання па выбарах старшыні Савета, а таксама парадак вызвалення яго ад пасады або датэрміновага складання паўнамоцтваў вызначаюцца рэгламентам Савета.

Старшыня Савета:
  • прадстаўляе Савет ва ўзаемаадносінах з іншымі дзяржаўнымі органамі, у тым ліку міжнароднымі, органамі тэрытарыяльнага грамадскага самакіравання, арганізацыямі і грамадзянамі;
  • падпісвае рашэнні і пратаколы пасяджэнняў Савета, яго прэзідыума, выдае ў межах сваёй кампетэнцыі распараджэнні;
  • арганізуе работу Савета, вядзе яго пасяджэнне (старшынствуе на іх), ажыццяўляе падрыхтоўку пасяджэнняў прэзідыума Савета, старшынствуе на іх;
  • склікае пасяджэнні Савета, даводзіць да ведама дэпутатаў і жыхароў горада час і месца іх правядзення, а таксама праект парадку дня;
  • аказвае садзейнічанне дэпутатам Савета ў ажыццяўленні імі сваіх паўнамоцтваў, арганізуе забеспячэнне іх неабходнай інфармацыяй, разглядае пытанні, звязаныя з вызваленнем дэпутатаў ад выканання службовых або вытворчых абавязкаў для працы ў Савеце, яго органах і ў выбарчых акругах;
  • каардынуе дзейнасць пастаянных і часовых камісій Савета, дэпутацкіх груп;
  • прымае да разгляду адрасаваныя яму запыты і дае па іх адказ у парадку i тэрмiны, устаноўленыя заканадаўствам;
  • забяспечвае разгляд зваротаў грамадзян, якiя адрасаваны Савету;
  • прымае i звальняе работнiкаў апарата Савета;
  • вырашае іншыя пытанні, даручаныя яму Саветам;
  • прадстаўляе штогод Савету справаздачу аб сваёй дзейнасці і дзейнасці прэзідыума.
Артыкул 15. Намеснік старшыні Мінскага гарадскога Савета дэпутатаў

Намеснік старшыні Савета выконвае функцыі ў адпаведнасці з рэгламентам Савета, даручэння старшыні Савета, а ў выпадках адсутнасці старшыні Савета або немагчымасці ажыццяўлення ім сваіх абавязкаў выконвае яго функцыі.

Намеснік старшыні Савета абіраецца тайным галасаваннем на пасяджэнні Савета па прапанове старшыні Савета з ліку дэпутатаў Савета на тэрмін яго паўнамоцтваў.

Па рашэнні Савета можа быць абрана некалькі намеснікаў старшыні Савета.

Кампетэнцыя кожнага намесніка старшыні Савета вызначаецца распараджэннем старшыні Савета і рэгламентам Савета.

Намеснік старшыні Савета падсправаздачны Савету і можа быць вызвалены ад абавязкаў тайным галасаваннем на пасяджэнні Савета.

Парадак унясення прапаноў аб абранні і вызваленні намесніка старшыні Савета ад пасады вызначаецца рэгламентам Савета.
 
Артыкул 16. Пасстаянныя камісіі Мінскага гарадскога Савета дэпутатаў

Пастаянныя камісіі Савета выбіраюцца на сесіі Савета з ліку дэпутатаў для папярэдняга разгляду і падрыхтоўкі пытанняў, якія адносяцца да кампетэнцыі Савета, а таксама арганізацыі выканання яго рашэнняў, рашэнняў вышэйстаячых дзяржаўных органаў і кантролю за іх выкананнем.

Парадак абрання і дзейнасці пастаянных камісій вызначаецца рэгламентам Савета і палажэннем аб пастаянных камісіях.

Для працы ў камісіях у парадку, вызначаным рэгламентам Савета, могуць прыцягвацца кансультанты і эксперты з правам дарадчага голасу.

Рэкамендацыі пастаянных камісій падлягаюць разгляду адпаведнымі дзяржаўнымі органамі, арганізацыямі, органамі тэрытарыяльнага грамадскага самакіравання.

Аб выніках разгляду рэкамендацый i прынятых мерах паведамляецца камісіі ў месячны тэрмін.
 
Артыкул 17. Сесія Мінскага гарадскога Савета дэпутатаў

Асноўнай формай дзейнасці Савета з'яўляецца сесія.

Першая сесія зноў абранага Савета склікаецца Мінскай гарадской тэрытарыяльнай выбарчай камісіяй пры абранні больш за 50 працэнтаў дэпутатаў ад агульнай колькасці, устаноўленай для Савета, не пазней чым праз 30 дзён пасля выбараў.

Сесія Савета правамоцная, калі для ўдзелу ў пасяджэнні Савета зарэгістравалася больш за палову ад ліку абраных дэпутатаў Савета.

Для забеспячэння работы сесіі Савета могуць абірацца сакратарыят, мандатная, рэдакцыйная і падліковая камісіі, група дэпутатаў па кантролі за працай электроннай сістэмы галасавання.

Сесіі праводзяцца адкрыта і галосна, за выключэннем выпадкаў, калі па рашэнні Савета неабходна правядзенне закрытага пасяджэння.

Сесіі Савета склікаюцца старшынёй Савета, а ў выпадках немагчымасці выканання ім сваіх абавязкаў або па яго даручэнні – яго намеснікам, прэзідыумам Савета, па ініцыятыве не менш чым 1/3 дэпутатаў Савета, а таксама старшыні выканаўчага камітэта, выбаршчыкаў з ліку жыхароў горада ў колькасці не менш за 10 працэнтаў іх спісачнага складу.

Сесія Савета можа быць таксама скліканая па патрабаванні Прэзідэнта Рэспублікі Беларусь у выпадках парушэння Саветам заканадаўства, парушэння правоў і ахоўваемых законам інтарэсаў грамадзян.
 
Артыкул 18. Дэпутат Мінскага гарадскога Савета дэпутатаў

Статус дэпутата Савета вызначаецца Канстытуцыяй Рэспублікі Беларусь, Законам Рэспублікі Беларусь ад 27 сакавіка 1992 г. № 1547-ХII "Аб статусе дэпутата мясцовага Савета дэпутатаў Рэспублiкi Беларусь" (Ведамасцi Вярхоўнага Савета Рэспублiкi Беларусь, 1992, № 13, ст.217), рэгламентам, гэтым Статутам і іншымі нарматыўнымі прававымі актамі.
 
Артыкул 19. Рашэнні Мінскага гарадскога Савета дэпутатаў

Рашэнні Савета – прававыя акты, якія прымаюцца Саветам па пытаннях, аднесеных да яго кампетэнцыі.

Рашэнні прымаюцца тайным або адкрытым галасаваннем, у тым ліку і паіменным.

Рашэнні прымаюцца большасцю галасоў ад ліку абраных дэпутатаў, за выключэннем выпадкаў, прадугледжаных заканадаўствам, гэтым Статутам і рэгламентам Савета.

Рашэнні Савета па найбольш важных пытаннях могуць прымацца пасля папярэдняга абмеркавання іх жыхарамі горада ў парадку, прадугледжаным заканадаўствам.

Рашэнні Савета абавязковыя для выканання выканаўчым камітэтам, адміністрацыямі раёнаў горада, усімі арганізацыямі, размешчанымі на яго тэрыторыі, службовымі асобамі і грамадзянамі.

Рашэнні Савета ўступаюць у сілу ў парадку, прадугледжаным заканадаўствам.
 
Артыкул 20. Забеспячэнне дзейнасці Мінскага гарадскога Савета дэпутатаў

Для арганізацыі бягучай работы, падрыхтоўкі сесій Саветам ствараецца апарат Савета. Арганізацыйна-тэхнічнае абслугоўванне дзейнасці Савета забяспечваецца выканаўчым камітэтам у парадку, устаноўленым Прэзiдэнтам Рэспублiкi Беларусь.
 
Глава 3. Мінскі гарадскі выканаўчы камітэт

Артыкул 21. Статус Мінскага гарадскога выканаўчага камітэта

Выканаўчы камітэт з'яўляецца выканаўчым і распарадчым органам на тэрыторыі горада Мінска з правамі юрыдычнай асобы.

Выканаўчы камітэт у сваёй дзейнасці падсправаздачны і падкантрольны Прэзідэнту Рэспублікі Беларусь і Савету Міністраў Рэспублікі Беларусь па пытаннях, якія ўваходзяць у кампетэнцыю Урада Рэспублікі Беларусь, а таксама адказны перад Саветам па пытаннях, якія адносяцца да кампетэнцыі Савета.

Выканаўчы камітэт забяспечвае эканамічнае, сацыяльнае, культурнае развіццё горада, паляпшэнне экалогіі гарадскога асяроддзя, зыходзячы з агульнадзяржаўных інтарэсаў і яго статусу як сталіцы, а таксама патрэб насельніцтва горада, выконвае рашэннi вышэйстаячых дзяржаўных органаў.
 
Артыкул 22. Кампетэнцыя Мінскага гарадскога выканаўчага камітэта

У планаванні, бюджэтнай палітыцы і фінансах:
  • распрацоўвае на аснове навуковага аналізу і прагназавання стратэгію ўстойлівага развіцця горада і кіравання ім; распрацоўвае і прадстаўляе на зацвярджэнне Савету праекты стратэгічнага плана, гадавых і перспектыўных прагнозаў і праграм сацыяльна-эканамічнага развіцця горада, забяспечвае iх выкананне;
  • распрацоўвае і прадстаўляе на зацвярджэнне Савету праект бюджэту горада, прымае меры па яго выкананні і прадстаўляе ў адпаведнасці з заканадаўствам справаздачу аб яго выкананні;
  • ва ўстаноўленыя тэрміны прадстаўляе ў Міністэрства фінансаў Рэспублікі Беларусь праект бюджэту горада на чарговы фінансавы (бюджэтны) год і справаздачу аб выкананні бюджэту горада за папярэдні фінансавы (бюджэтны) год;
  • арганізуе атрыманне даходаў бюджэту горада і іх выкарыстанне па мэтавым прызначэнні, прымае рашэнні аб правядзенні аўкцыёнаў;
  • выступае ў якасці заснавальніка банкаў (у тым ліку гарадскога), нябанкаўскіх фінансава-крэдытных арганізацый, страхавых арганізацый і іншых юрыдычных асоб;
  • укладвае і размяшчае свабодныя сродкі горада ў акцыі і іншыя каштоўныя паперы, дэпазіты, а таксама дае працэнтныя і беспрацэнтныя пазыкі,праводзіць латарэі і іншыя фінансавыя мерапрыемствы;
  • садзейнічае ўзнікненню на тэрыторыі горада арганізацый розных форм уласнасці, удзельнічае ў іх заснаванні на долевых пачатках;
  • ажыццяўляе кантроль за выкананнем заканадаўства па пытаннях цэнаўтварэння на тэрыторыі горада;
  • устанаўлівае ў адпаведнасці з заканадаўствам цэны, тарыфы, надбаўкі (скідкі) на тавары (работы, паслугі), на якія ўстаноўлена дзяржаўнае рэгуляванне цэн і тарыфаў, з улікам наяўнай сацыяльна-эканамічнай сітуацыі;
  • прадастаўляе льготы па выплаце дзяржаўнай пошліны і іншых абавязковых плацяжоў, якія паступаюць у бюджэт горада;
  • праводзіць рэвізіі стану бюджэтных і пазабюджэтных сродкаў адміністрацый раёнаў горада.
Ва ўпраўленні камунальнай уласнасцю, узаемаадносінах з прадпрыемствамі, установамі, арганізацыямі і аб'яднаннямі на тэрыторыі горада:
  • вядзе ўлік і рэестр уласнікаў нерухомай маёмасці, якая знаходзіцца на тэрыторыі горада, незалежна ад форм уласнасці на падставе дадзеных тэхнічнай інвентарызацыі ў парадку, устаноўленым заканадаўствам і рашэннямі выканаўчага камітэта;
  • праводзіць дзяржаўную рэгістрацыю, ліквідацыю (спыненне дзейнасці) юрыдычных асоб і індывідуальных прадпрымальнікаў у адпаведнасці з заканадаўствам;
  • распараджаецца маёмасцю, якая знаходзіцца ў камунальнай уласнасці, у парадку, устаноўленым Саветам;
  • ажыццяўляе ў адпаведнасці з заканадаўствам раздзяржаўленне і прыватызацыю аб'ектаў, якія знаходзяцца ў камунальнай уласнасці;
  • прымае рашэнні аб стварэнні, рэарганізацыі і ліквідацыі арганізацый камунальнай уласнасці ў парадку, вызначаным Саветам, зацвярджае рэжым працы такіх арганізацый, а таксама ўзгадняе рэжым працы іншых арганізацый незалежна ад форм уласнасці, размешчаных на тэрыторыі горада, калi iншае не прадугледжана заканадаўствам;
  • атрымлівае ад арганізацый усіх форм уласнасці, размешчаных на тэрыторыі горада, неабходныя звесткі аб праектах іх планаў і мерапрыемстваў, якія могуць мець экалагічныя, дэмаграфічныя, сацыяльныя і іншыя наступствы, якія закранаюць інтарэсы жыхароў горада, ажыццяўляе абавязковае іх узгадненне;
  • прадастаўляе ў першачарговым парадку ў арэнду будынкi, збудаваннi i iншыя аб'екты, якія знаходзяцца ў камунальнай уласнасці, дзяржаўным органам Рэспублікі Беларусь, а таксама дыпламатычным прадстаўніцтвам, консульскім установам замежных дзяржаў і прадстаўніцтвам міжнародных арганізацый у Рэспубліцы Беларусь;
  • ажыццяўляе па рашэнні Прэзідэнта Рэспублікі Беларусь або Савета Міністраў Рэспублікі Беларусь асобныя паўнамоцтвы па валоданні, карыстанні і распараджэнні размешчанымі на тэрыторыі горада будынкамі, збудаваннямі і іншымі аб'ектамі, якія знаходзяцца ў рэспубліканскай уласнасці.
У горадабудаўніцтве, землекарыстанні, жыллёва-камунальнай гаспадарцы:
  • праводзіць адзіную палітыку ў галіне архітэктуры, будаўніцтва, добраўпарадкавання, урымання, рамонту і рэканструкцыі жыллёвага фонду і аб'ектаў жыллёва-камунальнай гаспадаркі;
  • дэлегуе частку паўнамоцтваў адміністрацыям раёнаў горада ў галіне праектавання будаўніцтва і эксплуатацыі аб'ектаў, а таксама кантролю і нагляду за іх ажыццяўленнем;
  • распрацоўвае з улікам меркавання адміністрацый раёнаў горада і прадстаўляе на зацвярджэнне Мінскіх гарадскога і абласнога Саветаў дэпутатаў праекты адпаведна генеральнага плана развіцця горада і яго прыгараднай зоны;
  • зацвярджае праекты дэталёвай планіроўкі горада, правілы яго забудовы, нормы забеспячэння жыхароў горада жылой плошчай, аб'ектамі культурна-бытавога прызначэння і іншыя нормы ў адпаведнасці з заканадаўствам Рэспублікі Беларусь;
  • зацвярджае па ўзгадненні з адпаведнымі дзяржаўнымі органамі горадабудаўнічыя, будаўнічыя і эксплуатацыйныя нормы і правілы горада;
  • арганізуе будаўніцтва, рэканструкцыю і ўтрыманне на тэрыторыі горада аб'ектаў, неабходных для ажыццяўлення горадам функцый сталіцы Рэспублікі Беларусь, за кошт сродкаў у адпаведнасці з заканадаўствам;
  • прыцягвае са згоды ўласнікаў іх сродкі на развіццё тэрыторый горада;
  • прыцягвае ў адпаведнасці з заканадаўствам сродкі юрыдычных асоб у стварэнне (развіццё) сацыяльнай і інжынерна-транспартнай інфраструктуры горада;
  • устанаўлівае парадак вызначэння памеру і кампенсацыі выдаткаў за створаную інжынерна-транспартную інфраструктуру пры прадастаўленні зямельных участкаў;
  • устанаўлівае ў адпаведнасці з заканадаўствам парадак крэдытавання грамадзян у будаўніцтве жылля, уключаючы выкарыстанне сродкаў жыллёва-iнвестыцыйных фондаў, ажыццяўляе будаўніцтва сацыяльнага жылля;
  • інфармуе грамадзян аб прадастаўленні зямельных участкаў для размяшчэння аб'ектаў, дзейнасць якіх закранае інтарэсы гэтых грамадзян;
  • прадастаўляе зямельныя ўчасткі ў карыстанне, арэнду, пажыццёвае спадчыннае валоданне, перадае іх ва ўласнасць, а таксама адбірае зямельныя ўчасткі ў парадку і на ўмовах, прадугледжаных заканадаўствам;
  • перадае свае паўнамоцтвы адміністрацыі свабоднай эканамічнай зоны "Мінск" у частцы канфіскацыі, прадастаўлення і перадачы ў арэнду зямельных участкаў у выпадках, прадугледжаных заканадаўствам;
  • выкупляе ў грамадзян зямельныя ўчасткі, што знаходзяцца ў межах горада;
  • вырашае зямельныя спрэчкі ў адпаведнасці з заканадаўствам;
  • выдае дазвол на правядзенне пошукавых работ на зямельных участках на тэрмін не больш за адзін год па ўзгадненні з землекарыстальнікамі, землеўладальнікамі і ўласнікамі зямельных участкаў;
  • ажыццяўляе вядзенне гарадскога зямельнага і гарадскога горадабудаўнічага кадастраў;
  • ажыццяўляе кантроль за выкананнем правілаў утрымання і выкарыстання дзяржаўнага і прыватнага жыллёвага фондаў, прымяняе ў адпаведнасці з заканадаўствам меры адказнасці за іх парушэнне;
  • перадае ва ўласнасць, прадастаўляе ў пажыццёвае спадчыннае валоданне, карыстанне, арэнду і забірае ва ўстаноўленым заканадаўствам Рэспублікі Беларусь парадку зямельныя ўчасткі для размяшчэння жылых дамоў, будынкаў, збудаванняў, іншых аб'ектаў, у тым ліку аб'ектаў, неабходных для функцыянавання дзяржаўных органаў Рэспублікі Беларусь, а таксама дыпламатычных прадстаўніцтваў, консульскіх устаноў замежных дзяржаў і прадстаўніцтваў міжнародных арганізацый у Рэспубліцы Беларусь;
  • каардынуе i кантралюе дзейнасць арганізацый водазабеспячэння, энергазабеспячэння, транспартных і іншых арганізацый з мэтай забеспячэння надзейнага функцыянавання.
У сацыяльнай сферы і абароне навакольнага асяроддзя:
  • вырашае ў адпаведнасці з заканадаўствам пытанні аховы здароўя, адукацыі, сацыяльнай абароны і культурнага забеспячэння, гандлёвага, транспартнага, камунальнага, бытавога і іншага абслугоўвання грамадзян на тэрыторыі горада, абараняе правы бежанцаў;
  • уносіць ва ўстаноўленым заканадаўствам парадку прапановы аб абвяшчэнні (прызнанні) асабліва ахоўваемых асобных прыродных тэрыторый і аб'ектаў, помнікаў гісторыі і культуры, размешчаных у межах горада і прыгараднай зоны;
  • садзейнічае развіццю народных традыцый і звычаяў на тэрыторыі горада;
  • можа выступаць заснавальнікам навуковых і адукацыйных устаноў, а таксама сродкаў масавай інфармацыі горада;
  • удзельнічае ў адпаведнасці з заканадаўствам у вызначэнні рэкламнай палітыкі ў горадзе, клапоцячыся аб тым, каб рэклама, у тым ліку вонкавая, была добрасумленнай, дакладнай, этычнай, даступнай для ўспрымання і не накіраванай на шкоду жыхарам горада;
  • садзейнічае выкананню заканадаўства Рэспублікі Беларусь па пытаннях вайсковай службы ўсімі службовымі асобамі і грамадзянамі, а таксама арганізацыямі, размешчанымі на тэрыторыі горада;
  • забяспечвае законнасць і грамадскую бяспеку на тэрыторыі горада;
  • можа ўдзельнічаць у стварэнні і забеспячэнні працы рэспубліканскіх і міжнародных сістэм сувязі і інфармацыйных сетак;
  • плануе і ажыццяўляе ў адпаведнасці з заканадаўствам мерапрыемствы ў галіне аховы навакольнага асяроддзя, ажыццяўляе кантроль за выкананнем экалагічных нарматываў;
  • прыпыняе будаўніцтва, рэканструкцыю, капітальны рамонт або эксплуатацыю аб'ектаў у выпадку парушэння экалагічных, санітарных, будаўнічых норм і правіл на тэрыторыі горада;
  • распрацоўвае і прадстаўляе на зацвярджэнне ў Савет тэрытарыяльныя праграмы і мерапрыемствы ў галіне аховы навакольнага асяроддзя і рацыянальнага выкарыстання прыродных рэсурсаў, прымае меры па іх рэалізацыі;
  • ажыццяўляе на тэрыторыі горада дзяржаўны кантроль за выкарыстаннем і аховай зямель, нетраў, водных аб'ектаў, лясоў, расліннага і жывёльнага свету, а таксама за аховай атмасфернага паветра ў парадку, устаноўленым заканадаўствам;
  • арганізуе экалагічную асвету, адукацыю і выхаванне жыхароў горада, забяспечвае іх неабходнай інфармацыяй у галіне аховы навакольнага асяроддзя.
У арганізацыі кіравання:
  • распрацоўвае і прадстаўляе на зацвярджэнне Савету праект статута горада і змены ў яго;
  • распрацоўвае на навуковай аснове сістэму кіравання горадам і пастаянна ўдасканальвае яе, для чаго стварае адпаведную патрабаванням часу арганізацыйную структуру, якая спрыяе эфектыўнай дзейнасці гарадской выканаўчай улады;
  • накіроўвае, каардынуе i кантралюе працу адміністрацый раёнаў горада, садзейнічае іх дзейнасці;
  • вырашае ўскладзеныя на яго заканадаўствам задачы па арганізацыі выбараў і рэферэндумаў, а таксама абмеркаванню іншых найважнейшых пытанняў гарадскога і рэспубліканскага значэння;
  • устанаўлівае граніцы тэрытарыяльных утварэнняў (мікрараёны, кварталы і іншыя) у межах адміністрацыйна-тэрытарыяльных адзінак горада;
  • адмяняе ў межах яго кампетэнцыі рашэнні адміністрацый раёнаў горада, якія прыняты з парушэннем заканадаўства або супярэчаць рашэнням Савета і выканаўчага камітэта;
  • утварае па пытаннях яго дзейнасці камісіі, вызначае іх паўнамоцтвы і кіруе іх дзейнасцю;
  • прымае меры па забеспячэнні і абароне інтарэсаў горада ў судовым парадку, а таксама ў вышэйстаячых органах дзяржаўнага кіравання і іншых дзяржаўных органах;
  • забяспечвае інфармаванне насельніцтва аб важнейшых падзеях сацыяльна-эканамічнага і грамадска-палітычнага жыцця горада;
  • узаемадзейнічае на прынцыпах сацыяльнага партнёрства з прафесійнымі саюзамі ў вырашэнні сацыяльна-эканамічных задач;
  • узаемадзейнічае з грамадскімі арганізацыямі і рухамі, органамі тэрытарыяльнага грамадскага самакіравання;
  • арганізуе прыём насельніцтва кіраўнікамі выканаўчага камітэта і яго структурных падраздзяленняў, разглядае звароты грамадзян і прымае па iх рашэннi ў межах сваёй кампетэнцыі;
  • уносіць ва ўстаноўленым парадку прапановы аб прадстаўленні да дзяржаўных узнагарод і заахвочванняў;
  • прадстаўляе сталіцу Рэспублікі Беларусь – горад Мінск у адносінах з замежнымі дзяржавамі і міжнароднымі арганізацыямі.
Выканаўчы камітэт ажыццяўляе іншыя паўнамоцтвы ў адпаведнасці з заканадаўствам і Статутам горада, у тым ліку дэлегаваныя яму Прэзiдэнтам Рэспублiкi Беларусь, Саветам Міністраў Рэспублікі Беларусь і іншымі дзяржаўнымі органамі.
 
Артыкул 23. Структура Мінскага гарадскога выканаўчага камітэта

Структура i штатны расклад выканаўчага камітэта вызначаюцца старшынёй выканаўчага камітэта ў парадку, устаноўленым заканадаўствам, у межах бюджэтных сродкаў, зацверджаных Саветам на яго ўтрыманне.

Структурныя падраздзяленні выканаўчага камітэта могуць з'яўляцца юрыдычнымі асобамі і мець банкаўскія рахункі.
 
Артыкул 24. Рэгламент Мінскага гарадскога выканаўчага камітэта

Выканаўчы камітэт зацвярджае свой рэгламент. Рэгламент з'яўляецца нарматыўным актам, які рэгулюе парадак і формы дзейнасці выканаўчага камітэта.
 
Артыкул 25. Рашэнні Мінскага гарадскога выканаўчага камітэта

Выканаўчы камітэт у межах сваёй кампетэнцыі прымае рашэнні.

Рашэнні выканаўчага камітэта прымаюцца простай большасцю галасоў ад яго складу, падпісваюцца старшынёй і кіраўніком спраў выканаўчага камітэта.
 
Артыкул 26. Старшыня Мінскага гарадскога выканаўчага камітэта

Старшыня выканаўчага камітэта з'яўляецца вышэйшай службовай асобай і кіраўніком выканаўчай улады на тэрыторыі горада.

Старшыня прызначаецца на пасаду Прэзідэнтам Рэспублікі Беларусь і зацвярджаецца Саветам у парадку, устаноўленым заканадаўствам.

Старшыня выканаўчага камітэта:
  • разглядае ва ўстаноўленым парадку прадстаўленыя на ўзгадненне праекты законаў Рэспублікі Беларусь, актаў Прэзiдэнта Рэспублiкi Беларусь, пастаноў Савета Міністраў Рэспублікі Беларусь, рэспубліканскіх праграм, якія закранаюць інтарэсы горада;
  • уносіць на разгляд Прэзідэнта Рэспублікі Беларусь, Савета Міністраў Рэспублікі Беларусь праекты нарматыўных прававых актаў і іншыя прапановы па пытаннях, што тычацца горада;
  • прымае ўдзел у пасяджэннях Савета Міністраў Рэспублікі Беларусь з правам дарадчага голасу пры разглядзе пытанняў, якія закранаюць інтарэсы горада;
  • прымае ўдзел у вырашэнні пытанняў аб правядзенні ў горадзе мерапрыемстваў агульнадзяржаўнага і міжнароднага характару;
  • прымае ўдзел у вырашэнні пытанняў аб размяшчэнні ў горадзе дзяржаўных органаў, дыпламатычных прадстаўніцтваў, консульскіх устаноў і прадстаўніцтваў міжнародных арганізацый;
  • уносіць у адпаведныя дзяржаўныя органы прапановы аб перадачы або продажы ў камунальную ўласнасць горада аб'ектаў, якія знаходзяцца ў рэспубліканскай уласнасці, а таксама долей належачых Рэспубліцы Беларусь маёмасці ў статутных фондах гаспадарчых таварыстваў, размешчаных на тэрыторыі горада, калі яны маюць важнае значэнне для забеспячэння выканання горадам функцый сталіцы Рэспублікі Беларусь;
  • узгадняе прызначэнне і звальненне кіраўнікоў рэспубліканскіх прадпрыемстваў, размешчаных на тэрыторыі горада;
  • узгадняе пытанні аб стварэнні, рэарганізацыі, перапрафіляванні або ліквідацыі арганізацый рэспубліканскай формы ўласнасці, размешчаных на тэрыторыі горада;
  • прызначае па ўзгадненні з Прэзідэнтам Рэспублікі Беларусь першага намесніка, намеснікаў старшыні, кіраўніка спраў, іншых членаў выканаўчага камітэта, кіраўнікоў адміністрацый раёнаў горада;
  • прызначае намеснікаў кіраўнікоў і кіраўнікоў справамі адміністрацый раёнаў горада;
  • прадстаўляе выканаўчы камітэт ва ўзаемаадносінах з Саветам, іншымі дзяржаўнымі органамі, арганізацыямі і грамадзянамі, а таксама на міжнародным узроўні;
  • прадстаўляе на сесіі Савета па меры неабходнасці, але не радзей за адзін раз на год справаздачы аб дзейнасці выканаўчага камітэта, інфармуе Савет і грамадзян аб стане спраў на тэрыторыі горада;
  • арганізуе работу па падрыхтоўцы пасяджэнняў выканаўчага камітэта, вядзе пасяджэннi, забяспечвае кантроль за рэалізацыяй прынятых рашэнняў;
  • падпісвае рашэнні і пратаколы пасяджэнняў выканаўчага камітэта, выдае ў межах сваёй кампетэнцыі распараджэнні;
  • з'яўляецца распарадчыкам крэдытаў па расходнай частцы бюджэту і пазабюджэтных сродкаў горада;
  • накладае ў адпаведнасці з заканадаўствам дысцыплінарныя спагнанні на кіраўнікоў адміністрацый раёнаў горада, іх намеснікаў;
  • вызначае структуру і штаты выканаўчага камітэта, яго камітэтаў, упраўленняў, аддзелаў і іншых падраздзяленняў, кіруе імі, прызначае на пасады і вызваляе ад пасад кіраўнікоў аддзелаў, упраўленняў, камітэтаў і іншых падраздзяленняў выканаўчага камітэта, іншых работнікаў апарату выканаўчага камітэта, заключае ад імя наймальніка працоўныя дагаворы (кантракты) з работнікамі выканаўчага камітэта, прымяняе да iх меры заахвочвання, накладае на іх дысцыплінарныя спагнанні;
  • ажыццяўляе агульнае кіраўніцтва дзейнасцю падведамных выканаўчаму камітэту прадпрыемстваў, арганізацый, устаноў і аб'яднанняў, прызначае на пасады і вызваляе ад пасад з улікам меркавання адміністрацыі адпаведнага раёна іх кіраўнікоў;
  • прызначае па ўзгадненні з выканаўчым камітэтам на пасады і вызваляе ад пасад кіраўнікоў арганізацый, заснаваных на камунальнай уласнасці горада;
  • узгадняе на падставе рашэння выканаўчага камітэта кандыдатуры на пасады кіраўнікоў гарадскіх падраздзяленняў Міністэрства ўнутраных спраў Рэспублікі Беларусь, Камітэта дзяржаўнай бяспекі Рэспублікі Беларусь, Дзяржаўнага падатковага камiтэта Рэспублiкi Беларусь;
  • кіруе грамадзянскай абаронай на тэрыторыі горада, у выпадках стыхійных бедстваў, аварый, катастроф прымае меры па выратаванні людзей і захаванні матэрыяльных каштоўнасцей, нармалізацыі экалагічнай абстаноўкі, мае права для ліквідацыі наступстваў такіх надзвычайных сітуацый прыцягваць насельніцтва да выканання неадкладных грамадска неабходных работ і выкарыстоўваць матэрыяльна- тэхнічныя рэсурсы арганізацый, размешчаных на падведамнай яму тэрыторыі, незалежна ад форм уласнасці;
  • распараджаецца маёмасцю і фінансавымі рэсурсамі выканаўчага камітэта;
  • ажыццяўляе iншыя паўнамоцтвы, прадугледжаныя заканадаўствам, у тым ліку рашэннямі Савета і выканаўчага камітэта.
Артыкул 27. Першы намеснік, намеснікі старшыні Мінскага гарадскога выканаўчага камітэта

Першы намеснік, намеснікі старшыні выканаўчага камітэта прызначаюцца на пасаду старшынёй выканаўчага камітэта па ўзгадненні з Прэзідэнтам Рэспублікі Беларусь.

Паўнамоцтвы першага намесніка, намеснікаў старшыні вызначаюцца старшынёй выканаўчага камітэта.

Першы намеснік выконвае абавязкі старшыні выканаўчага камітэта ў перыяд яго адсутнасці або немагчымасці выканання ім сваіх абавязкаў.

Вызваленне ад пасады першага намесніка, намеснікаў старшыні ажыццяўляецца ў парадку, прадугледжаным заканадаўствам.
 
Артыкул 28. Пасяджэнні Мінскага гарадскога выканаўчага камітэта

Пасяджэнні выканаўчага камітэта праводзяцца па меры неабходнасці, але не радзей як два разы на месяц.

Падрыхтоўку пасяджэнняў ажыццяўляе кіраўнік спраў выканаўчага камітэта.

Пасяджэнні выканаўчага камітэта правамоцныя, калі ў іх прымае ўдзел не менш як дзве трэці ўстаноўленага складу выканаўчага камітэта.

Парадак правядзення пасяджэнняў і прыняцця рашэнняў вызначаецца рэгламентам выканаўчага камітэта.
 
Артыкул 29. Апарат Мінскага гарадскога выканаўчага камітэта

Для арганізацыі бягучай работы, падрыхтоўкі пасяджэнняў выканаўчага камітэта ствараецца апарат выканаўчага камітэта.
 
Глава 4. Адміністрацыя раёна горада

Артыкул 30. Статус адміністрацыі раёна горада

Выканаўчым і распарадчым органам на тэрыторыі раёна горада з'яўляецца адміністрацыя раёна, якая валодае правамі юрыдычнай асобы.

Адміністрацыі раёнаў горада ўваходзяць у сістэму органаў выканаўчай улады і з'яўляюцца органамі мясцовага кіравання.

У склад адміністрацыі раёна ўваходзяць кіраўнік адміністрацыі, яго намеснікі, кіраўнік спраў і члены адміністрацыі раёна горада.

Структура і штатная колькасць адміністрацыі раёна зацвярджаюцца выканаўчым камітэтам.
 
Артыкул 31. Кампетэнцыя адміністрацыі раёна горада

Адміністрацыя раёна горада:
  • забяспечвае на тэрыторыі раёна выкананне Канстытуцыі Рэспублікі Беларусь і законаў Рэспублікі Беларусь, актаў Прэзідэнта Рэспублікі Беларусь і Урада Рэспублікі Беларусь, выкананне рашэнняў Савета і выканаўчага камітэта, прынятых у межах іх кампетэнцыі;
  • распрацоўвае і ўносіць на разгляд выканаўчага камітэта схему кіравання тэрыторыяй і яе развіцця, прапановы аб структуры і штатнай колькасці адміністрацыі;
  • распараджаецца камунальнай уласнасцю горада ў межах паўнамоцтваў, прадастаўленых Саветам, выступае заснавальнікам арганізацый, заснаваных на камунальнай уласнасці;
  • арганізуе атрыманне бюджэтных i iншых даходаў i ажыццяўляе кантроль за іх мэтавым выкарыстаннем;
  • па ўзгадненні з выканаўчым камітэтам адкрывае рахункі для назапашвання пазабюджэтных сродкаў;
  • кааперыруе са згоды ўласнікаў сродкі прадпрыемстваў, арганізацый, устаноў і аб'яднанняў, арганізуе іх долевы ўдзел у сацыяльным і эканамічным развіцці раёна;
  • уносіць на разгляд Савета і яго органаў, выканаўчага камітэта прапановы па ўсіх пытаннях мясцовага значэння і ўдзельнічае ў іх разглядзе;
  • арганізуе ў парадку, устаноўленым заканадаўствам, кантроль за аховай атмасфернага паветра, вод, лясоў, нетраў, расліннага і жывёльнага свету, а таксама за выкарыстаннем камунальнай уласнасці;
  • арганізуе работу органаў тэрытарыяльнага грамадскага самакіравання, склікае сходы, у тым ліку сходы ўпаўнаважаных прадстаўнікоў жыхароў адпаведнай тэрыторыі, забяспечвае выкананне іх рашэнняў;
  • узаемадзейнічае на прынцыпах сацыяльнага партнёрства з арганізацыямі, структурамі прафесійных саюзаў, якія працуюць у раёне, у вырашэнні сацыяльна-эканамічных задач;
  • разглядае звароты грамадзян і прымае па iх рашэннi ў межах сваёй кампетэнцыі;
  • распрацоўвае і ўносіць на разгляд выканаўчага камітэта каштарысы расходаў мясцовай адміністрацыі, забяспечвае іх выкананне;
  • вырашае пытанні, звязаныя з землекарыстаннем, у адпаведнасці з заканадаўствам Рэспублікі Беларусь;
  • арганізуе будаўніцтва жылых дамоў, аб'ектаў сацыяльна-бытавога прызначэння і інжынерна-транспартнай інфраструктуры, рамонт жыллёвага фонду, дарог, забяспечвае кантроль за ўтрыманнем вуліц, кварталаў, прыдамавых тэрыторый;
  • забяспечвае мэтавае выкарыстанне і захаванасць дзяржаўнага жыллёвага фонду;
  • вядзе ўлік грамадзян, якія маюць патрэбу ў паляпшэнні жыллёвых умоў, прадстаўляе ім інфармацыю па гэтым пытанні, а таксама ажыццяўляе кантроль за станам такога ўліку ў арганізацыях, размешчаных на тэрыторыі раёна;
  • садзейнічае стварэнню і функцыянаванню арганізацый па абслугоўванні насельніцтва адпаведнай тэрыторыі;
  • вырашае пытанні, звязаныя з умацаваннем грамадскага парадку;
  • стварае ў адпаведнасці з заканадаўствам адміністрацыйную камісію, камісію па справах непаўналетніх, прызыўную камісію, назіральную камісію, камісію па барацьбе з п'янствам, грамадскую камісію па жыллёвых пытаннях, іншыя камісіі;
  • арганізуе кантроль за забеспячэннем супрацьпажарных мерапрыемстваў і бяспекі на водах;
  • прадстаўляе інтарэсы раёна ў дзяржаўных органах і ў адносінах з арганізацыямі;
  • прымае меры па забеспячэнні і абароне інтарэсаў раёна ў судовым парадку;
  • арганізуе працу па ўтрыманні ў належным стане помнікаў прыроды, гісторыі і культуры, культавых збудаванняў;
  • вырашае пытанні працаўладкавання, адукацыі, прафесійнай падрыхтоўкі, сацыяльна-культурнага, медыцынскага, гандлёвага, транспартнага, бытавога і іншага абслугоўвання жыхароў раёна ў межах і парадку, устаноўленым заканадаўствам;
  • садзейнічае развіццю народных традыцый і звычаяў;
  • можа выступаць заснавальнікам мясцовых сродкаў масавай інфармацыі;
  • ажыццяўляе iншыя прадугледжаныя заканадаўствам паўнамоцтвы, дадзеныя ёй Саветам і выканаўчым камітэтам.
Адміністрацыя раёна дае справаздачу аб сваёй працы перад выканаўчым камітэтам, а таксама сістэматычна інфармуе грамадзян раёна аб сваёй дзейнасці.

Пасяджэнні адміністрацыі раёна праводзяцца яе кіраўніком па меры неабходнасці, але не радзей за адзін раз у месяц і лічацца правамоцнымі, калі ў іх прымае ўдзел не менш за 2/3 членаў ад устаноўленага складу адміністрацыі.

Рашэнні адміністрацыі раёна прымаюцца простай большасцю галасоў ад устаноўленага складу адміністрацыі.

Парадак правядзення пасяджэнняў і прыняцця рашэнняў вызначаецца рэгламентам адміністрацыі раёна.
 
Артыкул 32. Кіраўнік адміністрацыі раёна горада

Кіраўнік адміністрацыі раёна прызначаецца на пасаду і вызваляецца ад пасады старшынёй выканаўчага камітэта па ўзгадненні з Прэзідэнтам Рэспублікі Беларусь. Намеснікі кіраўніка і кіраўнік справамі адміністрацыі прызначаюцца на пасаду і вызваляюцца ад пасады старшынёй выканаўчага камітэта па прадстаўленні кіраўніка адміністрацыі.

Кіраўнік адміністрацыі раёна:
  • кіруе дзейнасцю адміністрацыі;
  • зацвярджае па ўзгадненні са старшынёй выканаўчага камітэта персанальны склад адміністрацыі раёна, за выключэннем намеснікаў кіраўніка і кіраўніка справамі адміністрацыі;
  • прызначае на пасаду і вызваляе ад пасады супрацоўнікаў адміністрацыі;
  • арганізуе работу па падрыхтоўцы пасяджэнняў адміністрацыі, вядзе гэтыя пасяджэнні;
  • арганізуе і кантралюе выкананне рашэнняў адміністрацыі;
  • размяркоўвае функцыі паміж сваімі намеснікамі, іншымі супрацоўнікамі адміністрацыі;
  • падпісвае дагаворы, фінансавыя і банкаўскія дакументы, з'яўляецца галоўным распарадчыкам крэдытаў;
  • прымяняе да супрацоўнікаў адміністрацыі меры заахвочвання, накладае на іх у адпаведнасці з заканадаўствам дысцыплінарныя спагнанні;
  • прадстаўляе адміністрацыю ў адносінах з іншымі дзяржаўнымі органамі, а таксама арганізацыямі і грамадзянамі;
  • падпісвае рашэнні адміністрацыі і пратаколы яе пасяджэнняў, выдае ў межах сваёй кампетэнцыі распараджэнні;
  • ажыццяўляе іншыя паўнамоцтвы, прадугледжаныя заканадаўствам.
Глава 5. Тэрытарыяльнае грамадскае самакіраванне і іншыя формы гарадскога самакіравання ў горадзе

Артыкул 33. Тэрытарыяльнае грамадскае самакіраванне ў горадзе

Тэрытарыяльнае грамадскае самакіраванне ў горадзе –самаарганізацыя яго жыхароў на добраахвотнай аснове па месцы іх жыхарства (мікрараёны, кварталы, вуліцы, двары, дамы з прылеглай тэрыторыяй і іншыя ўнутрыгарадскія тэрытарыяльныя ўтварэнні) для самастойнага і пад сваю адказнасць ажыццяўлення ўласных ініцыятыў у пытаннях гарадскога значэння непасрэдна насельніцтвам або праз ствараемыя ім органы тэрытарыяльнага грамадскага самакіравання.

Тэрытарыяльнае грамадскае самакіраванне ў горадзе ажыццяўляецца ў адпаведнасці з заканадаўствам, гэтым Статутам і прыкладным статутам камітэта тэрытарыяльнага грамадскага самакіравання, якое зацвярджаецца Саветам і выканаўчым камітэтам.
 
Артыкул 34. Стварэнне органаў тэрытарыяльнага грамадскага самакіравання

Органам тэрытарыяльнага грамадскага самакіравання з'яўляецца камітэт, які можа надзяляцца правамі юрыдычнай асобы.
Дата абнаўлення: 23.01.2019
Распрацоўка і суправаджэнне КУП «Цэнтр інфармацыйных тэхналогій Мінгарвыканкама» © 2001—2020